KOLONBA NI TLAXI DI UBWA

KOLONBA NI TLAXI DI UBWA

Nta konta nanse unwa soya ku ta ka-fla di pletu ku ka-fe tudu kwa pa e bluguna ba tela kolonba punda tela ku e nanse ne na bwa fa. Ola se nsama kwa "Vida Kolonba", maji oze kwa sa otlo kwatu ku a ka-konde da tudu nge. Sa kolonba ku sa tela dinen ka-padise di vede, o pyolo doke pletu ku ka-xe kole ba linpa son ku ke-banyu di kolonba pa nen be djelu di kopla kwa ni fela dala Putuga. Kwa ku nska-pe nayen sa kwa ku povo na sebe fa, kwa ku yo folo na ka-kele kuma e sen di mundu se fa. Kwa ku pletu ka-pya ni televizon sa tela non ku nen manu non pletu ku sa ni padise, ku gela ku mixidaji. Maji a na ta ka-sebe kuma yo kolonba bebedadu ku mon ku ope ni son, blutu ku na be modu di futa non djelu ka-vive fa.

Ntason pya kwa y nlenbla kuma nen fyadu se ku ka-kole ku boka fede ba manda non ba nfenu, volovolo non fla kuma non na sebe manda ni tela non fa - ku lazon -, te nge mo dinen kondidu ni nglentu taxka ka-mole dinen pobli mo kaso. Yo dinen ta sa ma nge me ku desu na zuda fa, ku nda matu ka-da pletu nkome, ka-fe otlo nge mali, zo ola a ka-bila ve se a na ka-be nge di sebe dinen fa. Kwa sa axen: mali ku a fe a ska-page nayen me. Nga mese pa nen na mole sedu fa! Pa nen padise, pa a po sebe kuma ku pletu ku a ska-fe mali ni mundu se ka-xintxi.

Mo yo dinen kwase a na ka-pye ni Aflika fa, punda e sa kwa ku ka-dinen vlegonya, munsa kwa ku ka-suzinen kala, fe nen ko pletu pobli ten, nska-pe nayen pa nanse po pye, pa a sebe kuma tela se ku a ka-kole be na sa ose mo a ska-kunda fa.


I. KOLONBA PLIGISOZU KU KA-VIVE NI LWA
Unwa sunge ku te 38 anu ku na mese tlaba fa. Zo mo pe de na bila sen fa, pa de kwa kume ku kwa pa e po bixi y mo e deve nge djelu e plede ke ku e ta ka-ta ne y oze e ska-vive de ni lwa mo kaso ku na te donu fa, ni basu di fyo ku suba. Maji ise sa vida ku yo kolonba te ni Putuga, kamya ku yo pletu ka-mese kole be ba ta ne, zeta SanTome ku Ie non. Sun se ku sa ku beba fomi ska-gwada dja motxi tan, punda e te yo kaso ku gatu ku te bon vida milyon doke yo pekado ni mundu se. Kaso ku gatu ka-te donu nen liku-liku ku ka-sebe dinen maxi doke mina ku nen ka-pali pe kinte, y nen bisu se ka-vive dinen ni menmen ke ku kume ku lopa labadu, zo ku nge pa a xe ku e ba paxa ni karu.





II. POBLI SA DE POBLI ANTE DJA MOTXI
Ise sa vida di kolonba ku na nanse ku kadela da ose fa, ku a na ka-mese sebe dinen fa. Nen ka-ta ni ke ve ku suba ka-kye awa ka-lentla ke monya kama. Kinte ku xtlada ku a ka-ta ne ka-sa suzu kotokoto, ku yo di anzu ku ka-sa vajinvajin, ka-venta kwa di kenta kabesa tan, nen mina ka-sa ka-va kadela tan, maxibin ka-sa ka-futa nge kwa, a na ka-ba xkola fa. Nen pe ku men dinen ten ka-sa ku boka fede ni nglentu vin ku seleveja tan, a sa maxi blutu doke poto ke. Nayen a ka-pya modu ku kolonba ku ka-fe patxi di povo, ku sa maxi montxi pobli pyolo doke non, ku yo pletu na konse fa ka-vive ni Putuga ku otlo-otlo tela dinen.





III. VIVE NI KIXIPA KU BLATA
Nge ku na te kwa ni kabesa fa ka-kunda nska-mintxila, maji tudu nen kwase sa vede y e sen ni tudu kamya. Non soku ka-kunda kuma mo a ka-pe kwa non tan ku sa mali pa non tende, zo pa kolonba po li non, sa punda nen na te kwa mali ten fa. Nayen, a ka-be kuma e te kolonba ku ka-ta ni kixipa ku blata ku latu ku koblo, kamya ku ka-fe fyo luma, ku awa suba ka-lentla, ku sela a duminu ku buyadu ni lansolo ku manta ku yo lopa ni ubwe.





IV. VIVE NI KIXIPA VE
Nen sunge ku sange ku bila ve ketekete ku te nove mina maji nyunwa dinen na ka-zudi pa a po xe ni kixipa se ku a sa ne fa. Unwa dja me tudu kwase ka-bluguna kye nen pe kabesa, zo nen nge ku sa pode ka-kole tlapaya tufu mon pe zete mo nen ngandu se ku sa pode ni tela non en...





V. KOLONBA POBLI KU VLEGONYA
Nanse ka-be kolonba ku ka-fe poji ni we pletu maji xi a bili poto di koboke dinen a ka-konde, punda a ka-te vlegonya. Yo dinen ka-sa ka-mese sa nge godo. Nge txoko ku toka sa ni kantxin ku toke, ka-sa ka-plesa banku djelu pa a kopla karu novu, kopla ke novu, pa a fe poji da nen migu dinen. Zo ola a ka-be kuma vida na sa axen fa. E te liku ku ka-po vive vida se y e te pobli ku na toka vivee fa, e ka-sa taji. Yo maxibin ka-mese bila dodo, ka-sa ka-fla vonvon. Zo mo a sa blutu a ka-kunda kuma e sa fata di sotxi! Na sebe kwa sa we xa ku tlebesube. Ola nen kwase ka-da ku a ka-be pletu ka-tlaba pa e nganya vida de, kopla kwa de, a ka-sa ka-da mali pletu ku tudu dentxi ku a te ni boka, zo bila fla kuma nen soku toka sa ku vida ku pletu se ska-te. A ka-sa tasondu ka-gwada pa Xtadu po dinen djelu, pa a na tlaba fa.





VI. XTLUVISU NA SEN FA!
Yo kolonba sa monlinpu pasa... a na ka-mese pega kwa ku mon di tlaba fa. A ka-mese pa a sa mundjadu ku mon ni jibela ka-manda pletu fe kwa, ka-sa bixidu ku fatu ku glavata ku mon ni pontada ka-fe poji da nen mina A ka-saya sigaru pe boka ka-venta ka-bebe vin, ka-sa tasondu ka-legabofi, pe ope liba do ope ka-xina papelu o ka-volo nge (punda vonte nyo di sebe di kwa da nge, a na ka-mese lanta ni kadela fa) ni telefoni. Tlaba ku sa tlaba me di zuda tela ba we a na ka-mese fa, zo a bila we pe non pletu. Ba tlaba fan! Pletu di meda, pligisozu...

Sun se ku ska-fla ni kwa en te unwa 40 anu axi y e na ska-tlaba en fa. Sunge fla kuma e na mese tason ni ke ka-lesebe djelu di Xtadu fa, punda e mese xtluvisu. E fla kuma e fe oto kursu y e bila fe lejixtlu ni vinti tlexi. Sa sun sa matu ka-xina kwa maji nadaxi sun na ska-xtlivi ku e fa. Sun poja sa mo nen gabon se tenpu ku na ka-mese fe nadaxi fa, ku ka-ngana mwala, ka-futa nge vin pa e ba bebeda. A pya kala sun fan!




VII. KOLONBA VE Y SOLE
A ka-fla kuma kolonba sa bon nge, kuma nen na ka-fe nge mali fa, kuma a mese kwa fina da pletu, maji nen kwase na sa vede fa. Yo dinen ku sa ve en ta ka-fe pletu mali muntu, zo oze mo kwa plaga, a na mese sebe dinen fa. Xtadu ka-zetinen mo kaso di ovu. Nen na bon nge fa, sososo ante anzu ni kinte na ka-mese ta ope dinen fa. Ola a ka-flima a ka-xe kole ba ta ni otlo kamya ku e na ka-te modu pa nen ve se po daninen dja fa. A ka-zetinen pa a mole dinen ku plaga dinen. Maxi montxi dinen ka-mole di dijgoxto, a ka-pensa mole. Non na mese pa nen donu non po mole se nge ke ni bodo dinen fa! Punda inen ku tom konta non ku nen mina non, ola a ka-sa kwaji nada pa a desa non ni mundu se a toka te unwa vida baleladu mo desu mese. Zo xi nge ke na zudinen fa, Xtadu soku toka fee, punda nen ten sa mina tela.





VIII. KOLONBA SE KWA KUME
A ka-kunda kuma tela pletu tan soku te mixidaji ku te nge ka-padise, maji e na sa vede fa. Yo nge ska-padise ni mundu se y kolonba ten. Kolonba ka-sa ku vlegonya di piji nge kwa kume. E te yo dinen ku ka-dwentxi ku a na ka-sebe me fa. Nen mina ka-vwavwa kye matu y a na ka-mese sebe di nge ku kya inen fa. Xi a ta ka-tlaba ni losa, ka-fe xtluvisu ku te matxi pasa, ola a ka-klese ku a ka-ba tlaba ni poson, a na ka-mese tende ka-fla ni nomi di kamya ku a nanse ne fa! Maji nen kese kuma nen ten ka-bi bila ve y xi a na xina nen anzu kwa gletu fa sa unwa dja ten, nen ten ka-bi golo zuda y a na ka-be fa. Sa mo mundu se non sa.

Maji kwa ku nta mese fla sa: kolonba ten ska-padise muntu maji e na sa mo pletu fa! Kolonba ska-mole ku fomi maji na sa mo pletu ten fa! Kolonba ka-te zuda di yo migu ku sa kolonba di otlo tela ku na ka-mese pa mundu po pya blanku mo nge ku ka-pasa mixidaji fa! A ka-mese pa ola pletu ka-bili boka fla kuma a sa ku fomi pa a zuga glon di loso ni avyon pa non po koye ni son kume. Sososo nen kwase ka-dinen vlegonya ku a ka-konde da kolonba ten ku na konse kwa ku sa vida di tudu dinen fa. Kwa ku a ka-munsa sa fomi ku gela ni Aflika, y djelu ku bon vida di kolonba ni tudu kwa ku a te ni televizon, jina "novela", flimi, livlu.



Nen ke mu e... A be?! Kolonba pobli ni Putuga... e ko kwa ku pasa jina ola nen donu non ta txoko!
AWO! E BILA KAKA DI PLOKO!

KWA NATA

KWA NATA

Non say, nen ke mu e...
Dja Nata xiga de y e ska-be de za,
Non say ka-sama Desu ante dja se,
Dja ku a ka-sama nen demono ba Nfenu.

Oze nmese fada nen tipu se, ku sa tlaxi mu ska-golo di fe mu mali, pa a po tom kwidadu ku ami di vede o. Nna ka-poda kaso ola e ka-futa mu pixi fa! A ba punta nge punda kwamanda ku nfada mana mu pa e po na bila lumya ni ami ola e ka-xkleve da nge fa, xi ami ku e sa ni demanda, ke kamya ku mana mu ska-ta ne, kenge ku sa men dinen mina mu, nen kwase.

Pekado mese buli ku ami maji e na konse mu fa! Pekado sa matu ka-golo mu ku kandja di dana mu vida. Maji kwa nga fada nen djabu se sa: nsa ku pingada mu ni tlaxi poto ka-gwadinen, nsa ku pingada ni jibela di jibon ku nga nda ku e tudu ola, nga dumini ku pingada ni meza di kama. Xi a floga, nga da pekado ku bala o!

Kwa ku nsebe tan sa ola nga te nen demono se ku mon, a ka-bi sola piji mu poda. Nna ka-podinen ten fa! Djabu po levinen! Kwa nna mese tan sa pa a golo di lentla ni computer mu ku pokaria nen, ka-vijavija nge mo ladlon ku kliminozu. Nanse sa vizadu! Na buli ku ami fo, punda Desu! Nga piji migu mu Kanble pa e manda nanse "torjan", pa dana nanse computer buta!

Mo tudu dja sun na ka-po sa bloxidu ku pekado fa, oze nska-bi pe unwa mina kwa nay pa nanse li pikina. Kwa sa axi: e te nge ku ka-mese li ku kwa ku toka otlo nge ku a ka-mese be mali, maji nayen nmese munsa kwa di mina pikina ku na te xintxidu di kwa mundu gletu antawo fa.

Nska-pe dosu kwa nayen pa a po pya. Unwa de sa di unwa mosu tamen za ku ka-pe dedu de ni boka di manu de maxi txoko. Ola e ka-mole ku dentxi...kidale! Maji nna gogo ku kwase ku nska-pe nay montxi fa, punda e sa kwa ku nen pletu ka-gogo di kopya nen kolonba elemanda..., zo e ka-fika mali me da nen blutu se ku ka-be nge ka-fe kwa ka-kole ten ba fee. Kwakwali modu, e te nge ku ka-pye y e ka-lenble ola e ta txoko ku nen manu de ta ka-floga ni vaji di donu dinen, ni matu di safu ku jaka o ni kinte ku nen plimu ku migu ku a ta ku e ni xkola ka-klese zuntu.



Otlo ten sa unwa anzu ku sebe nganya dja de. Ola e ka-klese sela a tom xtensu ku e punda e sa mo dami ku ka-pya nen ngandu ku we di nge ku mese mata nge. Anzu se sebe fe we de di djabu ka-pya nge ola e ka-mese munsa kuma e na ska-floga fa. Mofala xi a buli ku e a sebe za! Kwa ka-ko kwa di bluku. Ngogo ku ise luma... ola a ka-pye a ka-bi kuji mu ele.



Bon, e xiga ola pa nba lele nen nge mu, punda non sa zuntadu ka-pasa dja non sosegadu, ni paji ku amole ni kloson y nna mese fla di kwa ku ka-damu leva fa. Nayen a ka-fla nge "Merry Christmas"! A zuga sun G.W.Bush ku sapatu pa e dae ni kala maji sun se poja sa mo demono, kwa na de ni kala fa! E munsa mundu kuma e sa blabu ni kwase za, kwakwali nge na ka-de ku kwa fa!

Mo a sa ni sun dotolo Barack O'Drama ka-fla tudu ola, nlenbla di munsa nanse kwase ten. E fe unwa vungu de, "O'Drama Rap - Whatever I like", ka-kanta ola e ka-nganya pode ni Melika. E ska-fe pa e ba vive vida de mo soba en... dja Nata ku Anu Novu ten poja ska-bi kole fina lekeleke!

Maji pa sun se xiga kamya ku e sa ne oze, ka-bebe champagne, sun padise muntu... E te pekado ku da mali sun dotolo O'Drama, paga nge pa fe kwa mali da sun. Ante unwa sange ku ka-sama Hilary, ku ta ka-fe pa e ba pode ten, da sun dolo kabesa pasa, fe tudu kwa pa sun plede kwase. Maji mo sun sa nge blabu... sun golo modu, bilakaba, pa sun po fe nge tende kwa ku sun ta mese fe da povo ni mundu se ku ska-dana de kotokoto. Nna sebe xi e va sange kadela ten pa san po dese ku vida de fa, maji ola a ka-pya kwa ku say basu a ka-po sebe.

Nanse ka-fika ku Desu. Kwa ku nga fada nanse di SanTome ku Ie sa, xi Desu mese: ANU MOLADU KUMA AXI!

Iyemanja zuda non!

VUNGU FESA

YA VUNGU DI PLETU NI AFLIKA, KU AMI, SUN JYKITI, PE NI FESA KU NDA NI KE MU, PLOVYA DI NOVA KU NTENDE KU DA MOLE DINEN NGANDU - DEMONNO NFENU - NI SANTOME KU IE; NEN NGE SE KU TA PODE KU FUTA DJELU POVO, BILA BENDE TELA NON DA KOLONBA LEGA POVO NI PADISE.

Artist & song: Teeyah - "Fo coupé décalé"
-> Edited by Jykiti Wakongo

NEN KE MU...NGOGO KU VUNGU SE LUMA!!
E SA VUNGU DOXI... KU NEN MINA GLAVIGLAVI, A KOTA KADELA BOKA ME BILI MU... NDANSA ANTE PLAMA BILI!

SELA NANSE DANSA MOLE DINEN DEMONO SE TUDAXI O!
A LANTA OPE!

Iyemanja zuda non

NTELU KU NOZADU

NTELU KU NOZADU

Non tende kuma nen demono nfenu se ku ta futa povo jina tenpu Pintu mole o! Nen tudaxi! Maji ntende ten kuma tle-tlexi ku ta pode mole ten. A fla kuma kwa tominen mo ola zalima bluku ka-lentla nge kabesa fe kwa ku bwade. A be nen nge godo ka-xa tan, ka-bila bega balili, ka-fla vonvon tan, ka-txila lopa xe lwa mo dodo. Nna sebe ke kwa ku da fa, maji Desu poja dese bi te ku non, o Djabu poja da Desu flokadu ni ose! E te ku ke poja pega fogo ten ku e, o ku mina mosu de ku ta ni we kwa guvenu, ni glentu de... Awo!

Pa kwa se da pa ne tenpu pa nen lentla avyon ba tela kolonba ba golo dotolo pa dinen mindjan pa nen yogo y pa kwa da ku inen ngandu se ku tason futa djelu povo tan... nna sebe fa! Boka me bili mu, punda nna ta ka-konta ku kwa se fa!

Nta tende ten kuma nen nge ku sa pode ka-sa ka-nda ku kolonba ka-dinen kadela pa nen va, zo kwa se ten poja sa plaga ku lentlinen o... A fla kuma yo dinen ka-sa migu di kolonba maji pa kolonba dinen djelu se ku a ka-fla kuma e sa da povo pe jibela, sa punda a patxi kadela ku nen mufinu se ku sayen ka-va nen anzu tudaxi kadela.

DJABU DA DESU FLOKADU NI OSE! KOLONBA VA FLADIKI KU NEN MIGU DE KADELA, ELEMANDA KU KWA SE DI MAKYADU KU A TA NE DA MOLE...

Tudu dja plama ola nga lanta, ami ku nen nge ke mu, non ka-laza plaga dinen tudaxi o! Elemanda ku oze mo kwa poja da setu, Djabu o Desu poja tende olason non, npe kwa nay di dja di ntelu ku nozadu dinen ku sa maxi godo, ku povo ka-ponta ku dedu.

Nna ta mese pa nen ka-mole axen fa, punda tudu nge te familya ni SanTome ku Ie, maji sela nen sebe kuma e te nge ku nen na ka-pota ku e fa, ku ka-mole ten ku a ka-ntela y Desu tan soku ka-tende. Punda nge xi ku sa we kwa tela toka pya kwa ku povo mese, pa e po vive mo dinen ten. Axifa, e na vale pena pa non ka-sa ka-kole ba koye inen pa pe ni pode fa! Milyon pa non sa se guvenu, ante ola ku e ka-bi plase nge xi ku sa mina folo me ku mese zuda tela, da tudu nge xtluvisu, xkola, xipitali, xtlada, kume, se koye "NOMI NGE" fa.


Punda kwa ku a ka-be sa ola sun ka-ba piji nen nge godo kwa, nen ka-pya sun kala, pya nomi sun, zo xi e na sa nge se ku a konse fa y ku te "nomi" ni tela fa, a na ka-bila mese tende kwa ku sun te di piji o puntinen maxi fa. O a ka-tom papelu se ku a ka-piji sun tan tufu pe fulu di uku.

Xi oze sa dja di ntelu di unwa dinen sun se, punda otlo-otlo mole yo dja za, a ntela fe nozadu tudaxi, somana ka-bi ka-sa nozadu di sun se. Non say ka-piji Desu non pletu, tudu dja ku sen, pa zalima dinen demono nfenu se po ba poto ni xitu se maxi petadu, ni nfenu, zo pa nen na lentla ni ose fa, pa a say ka-nda vonvon - pa a ka-sa nay ka-saminen "zalima penadu"...

A ka-ba pya kuma mundu se na sa di unwa o dosu nge tan fa. Tudu nge xi ku pensa kwa se mole mali muntu...

Ante dja se, ola ku non ka-bi sa we ku we, pa non fla di kwa ku pasa ni mundu se...

YO NGE MOLE NI OMALI

YO NGE MOLE NI OMALI

Yo nge mole ni omali, ni vapo ku kanwa

Yo nge mole ni xtlada, ku moto di plasa

Mole ku tudu ladlon di kwa ku toka povo

Mole ku ku nen demono nfenu ku azu dinen

Nen ke mu e, ola ntende kuma vapo ku ta ka-ba Ie (Plixpi) ku nge ku kega kye awa ku yo nge mole, azu maxi montxi, ubwe nda mu! Non sebe y non bila be kuma guvenu soku te klupa dinen kwa se ku ska-pasa ni tela non en...

Abe kuma ola a be kuma nge mole za, ku e na te we di bila tlaxi maxi fa! Mali da za! Soku a lenbla kuma e te djelu ku a ka-gaxta mali ka-da nen nge godo karu novu ku ka-kuxta yo djelu, ka-dinen ke ku kandja ku telefoni di glasa, ku otlo-otlo kwa vajin, ku a toka kopla unwa o dosu vapo novu pe ni omali da povo.

Non te yo di kolonba ku ka-lentla non tela ka-nganya yo djelu se fe nadaxi di zuda non, e bila te yo nge ku tudu dja ka-nganya yo djelu pa sebe di kwa ku toka povo, maji nadaxi tan a na ka-fe fa. Nska-gwada unwa dja ku a ka-bi piji mu favolo. Nga dinen ku kwa ni kabesa se oko! Kwa ka-lentlinen ni unwa kwatu xe ni otlo!

A be kuma nen nge se ku a ka-ba koye pe ni pode na ka-mese sebe di povo fa. Wola a ska-kole ba kopla kwakwali vapo ala pa a fla kuma a fe xtluvisu. Zo kwa ku ka-panta mu maxi sa nomi ku a ka-da nen vapo se ku omali nguli ku nge o ku kega... Nna sebe punda kwamanda fa ku a na ta ka-saminen "Mina Ie", "Ngandu" o "Pala-Xtlenu" fa!? Nomi di kolonba tan soku a ka-pe ni nen kwa se. Djabu levinen!

Nna ka-gogo ku sunge se ku ka-kanta ni tela di "madafakax yankees" fa, maji letla di vungu se ka-xtlivi da inen demono nfenu di SanTome ku Ie. Ni kamya ku "fifty" ka-fla "office down" o "man down" nga fla "CORRUPTS DOWN" - y nanse ka-fe mu favolo tende axen -, punda vungu se sa doxi muntu, ku toki di pingada ni olya dinen demono nfenu se ku sa pode. Y kwa ku tokinen na sa pa povo, non se pobli, po kijinen poda fa, maji pa xotxi ka-sa ka-kume inen ubwe en... Punda nge ku plede nge ke de na sa inen fa. Nen na ka-xintxi dolo fa! Kwa na da ni poto dinen fa, elemanda...

Nna ta mese xtlivi o lumya ku kwa ku otlo nge fe fa, maxi-maxi inen di tela di "mafadakax yankees", punda e ka-ko kwa ku sun na ka-po pensa kwa di fla o fe fa. Maji kwakwali modu npe nay tan pa a po tende kwa ku nska-mese fada nanse.

Nbila tende kuma a ska-mata yo nge ku kwa se di "moto di plasa". Nge ka-sa ka-kye ka-mole, ka-kebla mon, kabesa, ope, fika se modu di sebe di vida. Kwa se na ka-po sa fa! Punda kwamanda ku sun Fladiki fada povo kuma e te amole ku tela ku povo, xi ola a kopla "atokaru" pa zuda povo ku fata di "karu" a sa ni moto ka-subli ka-dese se nge di sebe di kwa se gletu. Ke tela ku non sa ne e?

NGE MUNTU SKA-MOLE NI OMALI, NI XTLADA, NI XIPITALI, NI KINTE - KOBOKE, NI LOSA, NI "KWARTEL" - KE SODE, NI "GOLPI DI XTADU", NI KADJA, NI SON POSON...

Nsay oze bloxidu ku tudu nen kwa se. Ku plesu di salu ku ka-loja non tela ntelu ku plesu di olo, ku fata di npon da nen anzu, ku fata di kwa di kume ni vende, ku nge godo ka-futa povo djelu ka-subli avyon ka-be de ba paxa, ku nen nge ku te klupa ni kwa se ka-nda nay ka-fe luxu pe liba non!

Zuxi na sen fa!?
Ante ke dja e, nen ke mu?

Oze nska-fla ni nomi di nen nge ku na ka-po bili boka fa, o ku a ka-fla ku a na ka-tende fa, maji pa a sebe kuma povo sa de faxadu ku nen pokaria se ku nen nge ku sa pode ska-fe o!

Oze nska-fla kwa ku leva ni kloson y nna ska-floga fa! Xi Desu sen, dja zuxi na ka-tada fa, a po tason gwada...

A tende mina vungu ku ka-musa modu ku nge ku a na ka-kupa ku e fa ola e ka-sa anzu antawo, kuma ku e ka-bila ola e ka-flima. Nna mese pa nen maxibin di tela mu po bila mo nge ku ska-mese mata nge tan fo! Nge ku na te amole ni otlo manu mo de fa.

A fe ku Desu e, Sun Mu!

Olya mu sa lizu,
Kabesa mu sa lizu.

XINA FISU

XINA FISU

Ni mundu se ku non nanse kontla, kwa sa de modu ku a mesee...

Xi non pya tlaxi, non ka-kole kabesa lenbla kuma kwa ska-dana de so...

A ska-xina nen anzu fisu jina ola nen ka-nanse y pletu soku ska-padise maxi...

Mon di pletu ku kalu ni sala-mon soku ka-lenbla mu tenpu ku kolonba ta ka-da pletu sotxi pa e tlaba da kolonba zo kume kwa ku toka kaso. Y tenpu, ne kaso di kolonba fina ta ka-kume nen kwa se fa.

Oze non ka-tende nen anzu ka-fla kada kwa ni boka, non ka-mese sonbla! Non sebe kuma yo nen kwa se ka-sa kwa ku nen pe ku men di nen anzu se ka-xina inen ni ke jina txoko. E te mina di kolonba, pikina antawo, ku ka-tason kume awa mo nge tamen. Nen ka-komesa ka-venta sedu, ka-tom yo mindjan ku sen pa a xintxi ubwe lizu pa a po fla ku mwala y floga ku nen migu. Xi a konta nge nen kwa se e na ka-kele fa, elemanda ku nga pe nen letlatu di nen kwa se ku mina kolonba ku vin ku sleveja ni mon ka-bebe, ku sigaru ni boka ka-venta. A ka-sa ka-xina anzu kada kwa ku ka-da sun mendu. Sun ka-be kwa, ubwe ka-nda sun...

Tenpu, mo yo nge ta ka-xe ni lwa ku luxpetu y sode ta ka-manda nge fe kwa ku Ale ta ka-mandinen, kwa na ta malaboya mo e sa oze fa! Ale ta ka-vija tudu nge ni poson, ni xtluvisu, ante ni ngletu di koboke! Nga pe kwa nay ni "ngleji" pa a po sebe ke kwa ku e sa y punda kwamanda ku a ka-fla kwa se oze. A ka-tende nge ka-fla fuck, maji tenpu kwa se ta te otlo xintxidu ku e te oze da yo nge. F.U.C.K. sa: "Fornication Under Consent of the King". E na ta sa kwa pa a floga ku e fa y pletu ku ta ni mon di kolonba ka-xtlivi yo di anu ta ka-te dja ku ola ku nen patlon ta ka-dinen pa nen ba dumini mwala.

Ni folo, F.U.C.K. sa: "Ale soku ta ka-kuji ome dja ku e ka-po na tlaba fa, pa e po kobo mwala de ni nglentu di koboke". Punda pletu na ta ka-konse kwa ku sa kansa fa, dja ku e na tlaba fa, mo kolonba. Nayen, nna mese fla modu ku Ale ta ka-fee ku kolonba fa, punda pla ami tan, djabu po levinen ba nfenu!...

Ola non ka-pya ni televizon, kwa ku a ka-musa non, di tela di kolonba, sa mina di kolonba bixidu ku kala di kaso ku na ka-kume ovu fa, ni xkola ka-pya livlu, o ni nen ke se ku te kwa di floga ka-kume doxi, ka-musa sawoji ku a te di bende. A ka-musa modu ku kolonba ka-tlaba pa a da nen anzu dinen bon vida ku ke pa a ta ne, ku bon vida ku a ka-te ni xitu ku a ka-ba paxa ne, o ola a ka-fe fesa di flegeja dinen o dja di Nata.

Ni otlo kamya, ku sa tela di pletu, sa otlo kwa soku ska-pasa. A na ka-be anzu ka-ba xkola fa. Yo dinen ka-sa losa ka-tlaba jina a ka-komesa ka-nda, ka-klaga kega ku pezu ni liba di kabesa. Ne floga a na ka-sebe ke kwa ku e sa fa! A ka-musa kala dinen pletu ku meka di awa we ku xe, plovya di kwa ku na sen pa a po pe ni bega fa. Pe dinen na ka-po xininen otlo kwa ku na sa te ni mantxi ku kwali, pa a po subli oke y dese vaji fa. A ka-zuda klaga bana, fluta, jaka, zekentxi ni kwali, bila klaga ngama di pixi pa a bende ni fela o ngama xa lopa pa a be ku e awa ba laba.

Xi nfla di mina di pletu ku ka-lanta sedu pa a zuda nge ke dinen ku xtluvisu, e te ten ku a ka-da pingada ku a na sebe tlaba ku e me fa, pa a da nge ku bala. Nen ngandu ka-xininen ka-da nge ku bala jina anzu antawo se sebe xkleve, punda a na ka-pinen ni xkola fa. Zo kwa maxi pyolo sa: a ka-tandinen pingada pa a mata tudu nge di kinte dinen, punda a ka-dinen mindjan, zo a ka-sa mo dodo ka-kole tlaxi di manu ku mana dinen pa a po mata.

Tudu nen kwa se ku a ka-fe sa nen nge tamen ku na te xintxidu fa, ku na sebe nadaxi di mundu se fa, ku ka-tom djelu pe jibela, kopla pingada ni mon di kolonba pa kolonba po sebe di vida dinen, bila godo, ba ple ba tom sleveja, va nen mina non anzu kadela (e po sa mina-mosu o mina-mwala), wanga maxkalenxa dinen pe non tela.

Kuma tudu non te we di pya, na sa ami ku ska-bi ku nova da nanse fa! A sebe kuma tudu nen kwa se ka-pasa ni tlaxi ke non, ni tela dinen donu non, dinen nge pletu mo non. Y non sebe ten, kuma djelu ku a ka-plomete pletu na ka-xiga ni mon non se txoko fa. Anzu ku na te livlu fa, na te kwa kume fa, na te kwa bixi fa, ka-ta de se tudu nen kwa se, ka pasa mixidaji y nge ku sa pode ka-sa ka-fe poko non pe liba de.

Mo nta fada nanse ni otlo ve, nen ngandu se ku sa tela tason pe ope ni liba di ope na ska-kupa ku povo fa. Kwa ku a mese tan sa pa djelu kye inen ni mon tan, pa a lentla avyon ba vive vida di kolonba. Zo ola a ka-xiga ala, a ka-sende mon piji jimola pa a "zuda" non se pobli ku say SanTome ku Ie ka-padise.

Ke kwa ku sa vlegonya da nen ngandu se ku sa SanTome?

Nen na te alima fa! A ka-fe nogoxo ku demono! Kwa ku a te tan sa kwa di makyadu tan!

Klonvesa dinen sa bola ku a ka-zuga ni tela di kolonba, ku a ka-da ni televizon mo kwa non!

A ka-fla di kadela di nen mina non ku ka-vala ni xtlada, di ixi ku a kobo za y ku a naxi kobo fa ku a ska-lema!...

Kwa ku non sebe sa kuma nen kwa se ku non ka-be ni mundu te ola ku e ka-bi kaba de. Y povo ku ta ka-padise ka-po txila nen doxi se ni boka unwa dja me! Punda oze, kolonba sa de tasondu ka-kume xtlolo ku likeza di pletu - pobli-, maji amanya kwa ka-po muda o!...

MATU

MATU

Mo a ska-be ple ni tela non, kwa ka-da nge vlegonya pasa! Non sebe kuma kwa se na sa kwa di oze fa! Yo dinen mina di nge godo komesa ka-xe ni koboke dinen ka-ba paxa ni ple y ola a ka-xintxi matu, a na ka-ba ke fa, a ka-fee ni ple me. Zo oze mo yo nge be kuma ante nen nge ku te kebanyu ni nglentu di koboke ka-fe matu ni ple, anton tudu kaso oze ten ka-suza ple non glavi ku matu.

Tudu non sebe kuma san nge se ku a ka-sama "Didinya" kopla kebanyu ni mon di guvenu pa e fe nogoxo ku e, xintoson. Kuma ku nen kebanyu se sa oze? A kuji mu fan...

Maji kwa se na ka-po sa fa! Kuma ku a ka-po tom tela non bila malaboya axen, e? Sun ka-nda sun ka-poto matu di nge godo y nge pobli tudaxi...

A ka-be matu ni tudu kamya! Maji kwa se kenge ku te klupa sa nen nge ku sa ni pode. Nen so toka xina nge modu ku a ka-vive ni poson, kuma ku a ka-xtlivi alya ni ple, kuma ku sode ka-xina povo modu di sebe di kinte ku sajinon tudaxi. Kwa se na sa ante kolonba soku ka-bi fada non ke kwa ku non ka-po fe pa non po te poson non linpu fa.

Non na ka-po gwada ante kolonba ka-bi tela non bi fla "Fradiki" ni olya fa, pa e po manda nge na suza ple fa, y xi a fe matu ni xkola, ni ple, o ni lwa poson, sela a te nge pa a labee o balye. Maji mo nfla ni liba, sela a xina nge kwa ni xkola, ni ke, mo tenpu "Pintu" - ku a ta ka-mundja ola a ta ka-tende vungu di "independenxa" o a ta ka-lanta bandela - ku nge ta ka-te luxpetu ku tela non.

Oze, ante nen nge ku sa pode ka-liginen mina, anzu, ba ku e ple pa a ba vinen kadela, zo xi a xintxi matu, a kunda ke kwa?! Nen na ka-kupa ku nadaxi fa! Xi a te modu a ka-va inen "katorzinya" se kadela, a ka-fe zawa, fe matu, zo laba ovu ni ple se me fan...

Sa mo a ka-be karu dinen nge godo notxi, mundjadu ni bodo di xtlada tan, ku anzu - mina di pobli - ni nglentu de.

AWO!

Dja di nanse na ka-tada fa!

Desu sa tamen!...

VENTA

VENTA

Non sebe kuma venta na sa kwa ku bwa fa. Punda jina tenpu ku non sebe kuma nen maxibin ta ka-venta pa a fe poji y musa nge kuma a sa flimadu za, maji mo kolonba fadinen kuma e sa unwa kwa bwadu, pletu kye ni sigaru ka-kopla ka-venta anu lentla anu se kupa ku djelu di kopla kume y se sebe mali ku kwa ta ka-fee fa.

Nkonse yo nge ku sa folo ku ka-venta punda a komese ola a ta txoko antawo. Maji mo a sebe kuma kwa sa mindjan ku ka-fe nge mali ni ubwe y e te nge ku na ka-po bila vive se venta fa, sela a pe ni xipitali ka-tom mindjan pa kaba ku maxkalenxa se.

Xi a pya kwatu se di folo ku ka-venta, ku ka-gaxta yo djelu ku pokaria se, ka-sa ka-bila ve sedu y pobli, maji nen kolonba ku te ke ku ka-fe sigaru (y mo a sebe nge ku te nogoxo se na ka-venta yo fa, sa mo nen nge ku ka-vende "lianba") ka-sa ka-bila dinen liku kada dja. A ka-be nen kolonba ka-pe kwa ni vende ku yo meka ku kolo pa tudu goxto y a ka-bele ni tudu kamya. Kolonba ten sa ne ka-venta y ka-mole ku dwentxi ku venta ka-da. Djelu ku a ka-nganya ku sigaru ni mundu ka-da sun leva. Kwa sa djelu muntu... Ku nogoxo se, e bila te otlo ku sen nay ku non na ska-fla ne nayen fa.

Folo na sa povo ku ka-venta ne bebe pasa fa, maji ka-dja nga be nen mina ku nen mosu ka-mese fe mo kolonba. Zo nmese puntinen: ke doxi ku venta se te? Ke kwa ku a ka-nganya ku venta se? Kenge ku a ska-pe dwentxi ni ke ku nanse - punda na sa nge ku ka-venta tan soku ka-dwentxi fa!?

Ni tela non - SanTome ku Ie -, non na toka te kwa se ni vende fa! Ke likeza ku kwa se te da non, povo se pobli, ku na te kwa kume fa?! Non sebe kuma e te yo vin ten ku a ka-sa ka-kopla ka-bi bende da non. Pla ami, nen pokaria se ka-sa vende ka-poto! Kolonba ku ka-bende nen kwa da non, nen mese bila liku tan. A mese pa a koplinen vin, tabaku, pingada, livlu ku uku ku a xkleve ne, ku otlo-otlo kwa ku maxi montxi ve na ka-xtlivi dinen nala tela dinen maxi fa.

A be kuma mo nge ku te nen ke se ku ka-nganya djelu ku tabaku sa kolonba, nen ke sen ante oze y a na ka-manda da fogo ne fisa fa. Nge ku na te sotxi fa o ixi ku te ubwe ku na ngwenta basa di sigaru fa soku ku ka-padise de so. Xi nga te unwa nen ke se ku ka-fe kwa di nganya djelu y xi kwa se ka-sa ka-mata nge, a na ka-tada yo di anu (49) ni xkola ka-golo di sebe xi e ka-fe mali di vede, zo pa a pe letla ni masu di sigaru pa a po pya kuma kwa ka-fe nge mali. Axen me a sa ni tabaku ka-bende yo antawo y anzu ten sa ne ka-kopla. Kenge ku mese sebe? Nen ngandu se ku sa we kwa tela non? Sun bebeda o!!...

Nayen, a ka-be kwa ku Nigeria fe plovya di nen ke se ku bende sigaru y fe pa yo maxibin komesa ka-venta sedu ni tela dinen, pa a po nganya maxi djelu:

http://brasilcontraapedofilia.wordpress.com/2007/11/07/nigeria-quer-indenizacao-de-us-42-bi-de-empresas-de-cigarro/.

Mo a sebe, ni mundu, nge ku sen maxi montxi ni unwa tela sa maxibin, elemanda ku nen kliminozu se ka-lentla nge tela pa a ngunda nen mosu ku nen mina pa a po kopla nen pokaria se. Zo ola a ka-sa flimadu ku mina soku maxkalenxa ka-sa ka-xe ba lwa. Sa kolonba bila de liku za y e na ka-mese bila sebe di molexta di pletu fa!

Kwa ku nmese tan sa pa a na bila kopla kwa ku non sebe kuma e ka-fe nge mali fa. Ise ku non na sebe antawo fa, sela non lanta mon ba liba sama Desu. Punda tabaku ku vin (e te folo ku konse nomi di tudu dinen ku a bende ni SanTome ku Ie) na te lazon di sa ni vende fa. Punda ke kwa?

Pa non te tela xa di vajin ka-nda ni xtlada ka-tloka ope, ka-ta ke tasondu ka-sende mon ola a ka-xintxi fomi ni bega?
Pa a te nge ka-futa povo nganya ni kapwela?
A ka-ba golo loso, sukli, npon, fanya, fezon, a na ka-be fa! Xa ke kwa?

Zo nen kolonba ku gabon ku ka-lentla tela ku mese nen kwa se, sela non fadinen kuma tela non na te nen pokaria se fa. Punda nge ku ka-venta ku ka-bebe sa nge ku te nogoxo ku djabu. Y non sebe kuma e sa vede, punda nen na ka-bwa ni kabesa, ka-fla vonvon so! Ka-ko nen ngandu se ku non te ni "parlamentu". Elemanda ku a ka-sa ni pokaria di vungu, ku nen kwa se ku a ka-kopla ni mon di kolonba pa a pe ni televizon pa povo po pya. A ka-sa ka-bende tela ku toka povo da kolonba y zuga povo pe ni lwa!

Djabu ka-levinen damu!

TLEBESUBE

TLEBESUBE

A fla kuma sun ka-nda sun ka-be kwa. Nna ta ka-kele ni kwa se fa punda sun ka-po sa mundjadu ten ni we di poto ka-kume kola y sun ka-po be kwa ten. Maji kwa ku ntende sa axi: xi sun lanta kadela ba golo kwa pa sun pe ni kabesa sun ka-po defende vida ni mundu se. Punda kliminozu ku te sebe na ka-ba kadja fa y ixi ku sa blutu soku ka-poto de nala.

Zo e te pobli ten ku ka-po na te modu di xe ni kadja ten fa, punda e na te djelu di monya nge mon fa! Maji unwa kwa sa setu: nge ku sa blabu na ka-mole pobli fa y a na ka-ngane fa, mo a ka-fe ku yo dinen pletu se ku sa ni mundu. A ka-be pletu ka-fe papelu di nge ku mese musa kuma e sa blabu, maji ola e ka-plase ni we nge pa e fe kwa a ka-li e, fe poko de y tudu pletu (ku na te nadaxi ni kabesa fa) ka-kuji koloba ten fla kuma e fika gletu. Nkonveta nen zentxi se!

Nayen nga ba pe dosu o tlexi kwa ku ka-musa modu ku pletu ka-fe kwa pa kolonba li peta zo sama non tudaxi blutu.

Xi a mese sebe punda kwamanda ku nen Ngandu ku ska-manda ni non folo ka-ko bobo dansu, a ka-pya kwa se ku npe nay ku ska-musa modu ku nen kolonba ka-fe kwa se lepalu ku nen Ngandu ten ka-kole ba fe. Tlebesube soku ka-fe inen folo se ku nen kolonba, ku mese musa mundu kuma a sebe kwa muntu y a sa blabu. Maji nge ku ka-fika mali ni letlatu maxi sa pletu, punda povo de sa pobli y a ka-kole ba piji inen favolo axen me. Pla inen folo se, vlegonya na sen fa! Yo dinen na sebe nadaxi me fa y a ka-sa ka-fe kwa malaboya so. E te jidinen ku sa mo di ise ku sa pode en... ku otlo-otlo Ngandu, ku na te xkola fa. A ka-fla kuma a fe kwa di dotolo a fe kwa di tlaba di zuda povo, di fe nogoxo, maji a ka-pya bega nen so.

E te nge ku ka-tende mu ka-fla nen kwa sa ka-blose, ka-volo mu. E te "folo" (ku sa maxi kolonba doke pletu) ku nen kwa se ku nte ni kabesa, ku nka-sa ne ka-xkleve, ku jina e nanse e naxi tende kolonba ka-fla fa, e ka-sama "jykiti-wakongijmu". Ngogo ku kwa se ku "gabon meda" se fla luma. E na ka-po same otlo kwa ten fa.

Nen kwa se ku ka-fe pletu ka-tende kolonba dodo sa punda a na te xintxidu di kwa mundu me fa. Tudu ola a ka-sa ni "akesimentu global" ka-fla ka-subli ka-dese y a ka-be kaso pletu, Ngandu tlebesube, ka-kujinen... "YO! Kalolo muntu ku kwa ska-fe o... kolonba te lazon de fan... AWO!". Nen kolonba se soku ka-nganya yo djelu non y inen soku ka-xina nen mina non kwa ni xkola pa a bila dotolo. A be blabu ku nen nge ku sa pode ni tela kolonba sa?! Zo non ka-be nen nosentxi se ku sa we kwa ka-manda ka-da ben dinen so... A be? Ke kwa ku a mese pa nen maxibin fe ni San Tome ku Ie xi a mese fe kwaxi ku a ka-be nen blutu se ka-fe?!




E komu kwa ten ku ska-kunda kuma nsa ku we xa dinen ku ka-ta ni tela di kolonba ka-nganya bon djelu, ka-legela ku djelu ku a futa non folo se pobli ni San Tome ku Ie, ka-kobo nen kolonba kadela, ka-fe nen anzu non mali ola a ka-bluguna ba tela non ba paxa.

Maji kwa ku nen na sebe fa sa kuma, xi desu ka-sa pletu y folo, nen ka-sa ni Obo ka-subli pema ka-txila vin; ka-poda kakai ku kafe ni matu; ka-tlaba aliba ku mantxin ni mon pa a ximya kitxiba ku min; ka-txila fluta ku safu ku jaka; ka-ba omali ba golo pixi pa palaye po bende ni fela; ka-ba matu bunzu, xtloko ku pape; ka-klaga zekentxi ni kwali ni liba kabesa plaman sedu; ka-klaga andji ni ngama ba mwala ba fe zete. Nen kwa se soku nen toka sebe ku toka sa dixtinu nen xi desu ka-sen ni mundu se non.

Xi desu se sen me di vede y xi e na sa zuxi ku ka-kuji ladlon, pligisozu ku kolonba fa, unwa dja me ke dinen ka-pega fogo ku nen ni ngletu de ku tudu kwa ku a tason kopla ku djelu povo.

VIDA KOLONBA

VIDA KOLONBA

Kuma ku mundu se non ka-po sa bwadu da pletu?

Non ska-sufli ka-tlaba ka-fe nogoxo ku kolonba, ka-dinen djelu ku olo ku petloli, maji axen me tela non sa de pobli, nga be nge ku kala fisadu so, se kwa di kume, yo nge pobli-pobli so, ku anzu ka-padise de, ku maxibin ka-fla vonvon...

Nge ku sa liba ka-manda ni povo na mese sebe di povo fa. A ka-be nen ka-subli avyon ka-ba tela ka-fada povo kuma a ska-ba golo djelu ku kume pa a po manda ni vapo da povo. Maji ola a ka-fo nen xitu se ku djelu ku a plesa ni jibela, a ka-pe ni otlo tela di kolonba pa a po kopla kwa ku nen mese pa a fe luxu ku e. Povo ka-sa ka-be nen nge "godo" - ngandu, ladlon ku a toka fisa ni kadja zuga sabi buta - ka-fla «awo!... nen nge se soku te sotxi!... nen nge se soku Desu koye pa te kwa, vive dinen bon vida nen...».

Non sebe kuma yo kolonba ka-te djelu pa e kume bila de godo, te bega nglandji - a ka-ba ple sende toia bila bega se balili-, y xi kume ku a te sa montxi a ka-zuga kume se buta o a ka-da kume fogo xi e soveza na bende fa. Nen ka-te djelu maxi doke pletu punda mofala xi a ba tela pletu a ka-kopla olo ni mon non xintoson, maji ola a ka-bluguna ba tela dinen olo se ka-vale yo djelu - ku ka-da pa nge na bila tlaba ni vida de maxi fa, ku ka-da pa e kopla avyon, vapo, fe menmen ke, paxa loja mundu ntelu. Pletu ku ka-tufu tloku (minda di kwa ku e ka-futa ku toka yo nge) pe jibela, e ka-kole tom avyon ba ligi unwa kwa ku ka-kuxta yo djelu bi ku e y ixi ku e sebe kuma a ka-ba pya ola e ka-xiga tela non - kwa pa e fe poji musa kuma e sa nge maxi doke otlo.

Yo dinen na ka-mundja ni tela non me fa, sela ola a ka-mese tom pode pa a tason bila fe nogoxo di dana tela non buta. Maji sela povo sebe kuma ola a ka-sa ka-nda ni nglentu nen karu se, o a ka-fe menmen ke pa a ta ne xa di kwa, sa djelu di yo nge ku na te kwa pa e kume fa soku kopla. Sela povo sebe kuma tudu kwa ku nen te ku djelu ku a ka-sa ka-fe poji ku e, ka-ngana nen mina nova ka-va kadela sa djelu ku toka nge ku ska-pasa mixidaji ni San Tome ku Ie.

Tudu non sebe kuma yo dinen nge se na nanse ku nen kwa se fa y a na tlaba pa a nganya djelu di kopla tudu nen kwa se pa plesu ku nen kwa se ka-vale fa. Sososo sa nen nge se ku ta ni we kwa povo ku xe, ku otlo-otlo ku sa ni tela non ka-manda ku te ma fe, ku ka-manda boka da mali povo pobli, ku ka-da mali di tela non ola a ka-sa we di kolonba, a toka dinen ku budu ola a ka-sa ka-vala ni karu. Nen nge pobli ku a ka-fe poko de toka te inen mala pe ome di xtlada zo zuga budu ante ola ku a ka-be kuma kabesa na bila sa bwa di fe nge mali fa...

Punda pa nen kolonba te djelu di vive bon vida nen bila liku, sela non pletu bila pobli pasa mixidaji, fika se djelu di kopla mindjan ku kwa kume. Y pa tela kolonba te bon ke, bon karu, pe nen mina nen ni xkola ka-xtuda ku livlu, lete ku npon, bon lopa, tudu dja, sela pletu dinen olo ku petloli. Punda mo nfla, pletu (ngandu) ka-fika ku "1000" pa kolonba po fika ku "1000000", sososo e na ka-po te modu di povo txoko po vive ni mundu se fa!

Tudu kwa ku ska-pasa ku pletu en... sa punda nge ku sa we di kwa non te ma fe pasa! Kolonba ten ku te ma kloson ku na ka-pota ku nadaxi xi e na sa djelu di bila bega nen godo fa, ku djelu pa a po tason konta ante ola a ka-mole, nen na mese sebe fa. Zo ola nen ngadu se ka-ba paxa ku kala nen ka-ko demono, nen kolonba ka-bili poto saminen pa a po tason tom unwa kopu vin da kebla...

Povo pletu ka-sa ka-mole de ni xipitali, anzu ka-fika ni ke o ba xkola ku fomi ni bega, maxibin na te xtluvisu fa. Ngandu ka-golo tudu modu (e po mata manu de pletu, mo yo dinen ka-fe ola a ka-futa djelu ba pe ni tela kolonba) pa a te vida di kolonba, elemanda ku tela non na ka-ba we fa.

Kolonba ten, ola e na ka-be modu di bila liku ni tela de fa, ka-bluguna ku unwa mon ni we y otlo ni tlaxi ba tela pletu ba "tlaba" djelu (klaga olo pe avyon o vapo, ola pletu ka-sa ka-dumini - punda ne kamya ku olo sa ne gwadadu pletu na ka-sebe fa...) ku pletu ka-tlaba dinen mo kaso-xinja. Zo ola a ka-ba tela dinen ku yo djelu ni jibela, ku bega maxi godo antawo, ku a ka-xiga ala, a ka-volo tudu non sama nomi...

Kwa mundu na ka-po be so fa!
Iyemanja ka-zuda non!
Ante dja se!