XINA FISU

XINA FISU

Ni mundu se ku non nanse kontla, kwa sa de modu ku a mesee...

Xi non pya tlaxi, non ka-kole kabesa lenbla kuma kwa ska-dana de so...

A ska-xina nen anzu fisu jina ola nen ka-nanse y pletu soku ska-padise maxi...

Mon di pletu ku kalu ni sala-mon soku ka-lenbla mu tenpu ku kolonba ta ka-da pletu sotxi pa e tlaba da kolonba zo kume kwa ku toka kaso. Y tenpu, ne kaso di kolonba fina ta ka-kume nen kwa se fa.

Oze non ka-tende nen anzu ka-fla kada kwa ni boka, non ka-mese sonbla! Non sebe kuma yo nen kwa se ka-sa kwa ku nen pe ku men di nen anzu se ka-xina inen ni ke jina txoko. E te mina di kolonba, pikina antawo, ku ka-tason kume awa mo nge tamen. Nen ka-komesa ka-venta sedu, ka-tom yo mindjan ku sen pa a xintxi ubwe lizu pa a po fla ku mwala y floga ku nen migu. Xi a konta nge nen kwa se e na ka-kele fa, elemanda ku nga pe nen letlatu di nen kwa se ku mina kolonba ku vin ku sleveja ni mon ka-bebe, ku sigaru ni boka ka-venta. A ka-sa ka-xina anzu kada kwa ku ka-da sun mendu. Sun ka-be kwa, ubwe ka-nda sun...

Tenpu, mo yo nge ta ka-xe ni lwa ku luxpetu y sode ta ka-manda nge fe kwa ku Ale ta ka-mandinen, kwa na ta malaboya mo e sa oze fa! Ale ta ka-vija tudu nge ni poson, ni xtluvisu, ante ni ngletu di koboke! Nga pe kwa nay ni "ngleji" pa a po sebe ke kwa ku e sa y punda kwamanda ku a ka-fla kwa se oze. A ka-tende nge ka-fla fuck, maji tenpu kwa se ta te otlo xintxidu ku e te oze da yo nge. F.U.C.K. sa: "Fornication Under Consent of the King". E na ta sa kwa pa a floga ku e fa y pletu ku ta ni mon di kolonba ka-xtlivi yo di anu ta ka-te dja ku ola ku nen patlon ta ka-dinen pa nen ba dumini mwala.

Ni folo, F.U.C.K. sa: "Ale soku ta ka-kuji ome dja ku e ka-po na tlaba fa, pa e po kobo mwala de ni nglentu di koboke". Punda pletu na ta ka-konse kwa ku sa kansa fa, dja ku e na tlaba fa, mo kolonba. Nayen, nna mese fla modu ku Ale ta ka-fee ku kolonba fa, punda pla ami tan, djabu po levinen ba nfenu!...

Ola non ka-pya ni televizon, kwa ku a ka-musa non, di tela di kolonba, sa mina di kolonba bixidu ku kala di kaso ku na ka-kume ovu fa, ni xkola ka-pya livlu, o ni nen ke se ku te kwa di floga ka-kume doxi, ka-musa sawoji ku a te di bende. A ka-musa modu ku kolonba ka-tlaba pa a da nen anzu dinen bon vida ku ke pa a ta ne, ku bon vida ku a ka-te ni xitu ku a ka-ba paxa ne, o ola a ka-fe fesa di flegeja dinen o dja di Nata.

Ni otlo kamya, ku sa tela di pletu, sa otlo kwa soku ska-pasa. A na ka-be anzu ka-ba xkola fa. Yo dinen ka-sa losa ka-tlaba jina a ka-komesa ka-nda, ka-klaga kega ku pezu ni liba di kabesa. Ne floga a na ka-sebe ke kwa ku e sa fa! A ka-musa kala dinen pletu ku meka di awa we ku xe, plovya di kwa ku na sen pa a po pe ni bega fa. Pe dinen na ka-po xininen otlo kwa ku na sa te ni mantxi ku kwali, pa a po subli oke y dese vaji fa. A ka-zuda klaga bana, fluta, jaka, zekentxi ni kwali, bila klaga ngama di pixi pa a bende ni fela o ngama xa lopa pa a be ku e awa ba laba.

Xi nfla di mina di pletu ku ka-lanta sedu pa a zuda nge ke dinen ku xtluvisu, e te ten ku a ka-da pingada ku a na sebe tlaba ku e me fa, pa a da nge ku bala. Nen ngandu ka-xininen ka-da nge ku bala jina anzu antawo se sebe xkleve, punda a na ka-pinen ni xkola fa. Zo kwa maxi pyolo sa: a ka-tandinen pingada pa a mata tudu nge di kinte dinen, punda a ka-dinen mindjan, zo a ka-sa mo dodo ka-kole tlaxi di manu ku mana dinen pa a po mata.

Tudu nen kwa se ku a ka-fe sa nen nge tamen ku na te xintxidu fa, ku na sebe nadaxi di mundu se fa, ku ka-tom djelu pe jibela, kopla pingada ni mon di kolonba pa kolonba po sebe di vida dinen, bila godo, ba ple ba tom sleveja, va nen mina non anzu kadela (e po sa mina-mosu o mina-mwala), wanga maxkalenxa dinen pe non tela.

Kuma tudu non te we di pya, na sa ami ku ska-bi ku nova da nanse fa! A sebe kuma tudu nen kwa se ka-pasa ni tlaxi ke non, ni tela dinen donu non, dinen nge pletu mo non. Y non sebe ten, kuma djelu ku a ka-plomete pletu na ka-xiga ni mon non se txoko fa. Anzu ku na te livlu fa, na te kwa kume fa, na te kwa bixi fa, ka-ta de se tudu nen kwa se, ka pasa mixidaji y nge ku sa pode ka-sa ka-fe poko non pe liba de.

Mo nta fada nanse ni otlo ve, nen ngandu se ku sa tela tason pe ope ni liba di ope na ska-kupa ku povo fa. Kwa ku a mese tan sa pa djelu kye inen ni mon tan, pa a lentla avyon ba vive vida di kolonba. Zo ola a ka-xiga ala, a ka-sende mon piji jimola pa a "zuda" non se pobli ku say SanTome ku Ie ka-padise.

Ke kwa ku sa vlegonya da nen ngandu se ku sa SanTome?

Nen na te alima fa! A ka-fe nogoxo ku demono! Kwa ku a te tan sa kwa di makyadu tan!

Klonvesa dinen sa bola ku a ka-zuga ni tela di kolonba, ku a ka-da ni televizon mo kwa non!

A ka-fla di kadela di nen mina non ku ka-vala ni xtlada, di ixi ku a kobo za y ku a naxi kobo fa ku a ska-lema!...

Kwa ku non sebe sa kuma nen kwa se ku non ka-be ni mundu te ola ku e ka-bi kaba de. Y povo ku ta ka-padise ka-po txila nen doxi se ni boka unwa dja me! Punda oze, kolonba sa de tasondu ka-kume xtlolo ku likeza di pletu - pobli-, maji amanya kwa ka-po muda o!...

MATU

MATU

Mo a ska-be ple ni tela non, kwa ka-da nge vlegonya pasa! Non sebe kuma kwa se na sa kwa di oze fa! Yo dinen mina di nge godo komesa ka-xe ni koboke dinen ka-ba paxa ni ple y ola a ka-xintxi matu, a na ka-ba ke fa, a ka-fee ni ple me. Zo oze mo yo nge be kuma ante nen nge ku te kebanyu ni nglentu di koboke ka-fe matu ni ple, anton tudu kaso oze ten ka-suza ple non glavi ku matu.

Tudu non sebe kuma san nge se ku a ka-sama "Didinya" kopla kebanyu ni mon di guvenu pa e fe nogoxo ku e, xintoson. Kuma ku nen kebanyu se sa oze? A kuji mu fan...

Maji kwa se na ka-po sa fa! Kuma ku a ka-po tom tela non bila malaboya axen, e? Sun ka-nda sun ka-poto matu di nge godo y nge pobli tudaxi...

A ka-be matu ni tudu kamya! Maji kwa se kenge ku te klupa sa nen nge ku sa ni pode. Nen so toka xina nge modu ku a ka-vive ni poson, kuma ku a ka-xtlivi alya ni ple, kuma ku sode ka-xina povo modu di sebe di kinte ku sajinon tudaxi. Kwa se na sa ante kolonba soku ka-bi fada non ke kwa ku non ka-po fe pa non po te poson non linpu fa.

Non na ka-po gwada ante kolonba ka-bi tela non bi fla "Fradiki" ni olya fa, pa e po manda nge na suza ple fa, y xi a fe matu ni xkola, ni ple, o ni lwa poson, sela a te nge pa a labee o balye. Maji mo nfla ni liba, sela a xina nge kwa ni xkola, ni ke, mo tenpu "Pintu" - ku a ta ka-mundja ola a ta ka-tende vungu di "independenxa" o a ta ka-lanta bandela - ku nge ta ka-te luxpetu ku tela non.

Oze, ante nen nge ku sa pode ka-liginen mina, anzu, ba ku e ple pa a ba vinen kadela, zo xi a xintxi matu, a kunda ke kwa?! Nen na ka-kupa ku nadaxi fa! Xi a te modu a ka-va inen "katorzinya" se kadela, a ka-fe zawa, fe matu, zo laba ovu ni ple se me fan...

Sa mo a ka-be karu dinen nge godo notxi, mundjadu ni bodo di xtlada tan, ku anzu - mina di pobli - ni nglentu de.

AWO!

Dja di nanse na ka-tada fa!

Desu sa tamen!...

VENTA

VENTA

Non sebe kuma venta na sa kwa ku bwa fa. Punda jina tenpu ku non sebe kuma nen maxibin ta ka-venta pa a fe poji y musa nge kuma a sa flimadu za, maji mo kolonba fadinen kuma e sa unwa kwa bwadu, pletu kye ni sigaru ka-kopla ka-venta anu lentla anu se kupa ku djelu di kopla kume y se sebe mali ku kwa ta ka-fee fa.

Nkonse yo nge ku sa folo ku ka-venta punda a komese ola a ta txoko antawo. Maji mo a sebe kuma kwa sa mindjan ku ka-fe nge mali ni ubwe y e te nge ku na ka-po bila vive se venta fa, sela a pe ni xipitali ka-tom mindjan pa kaba ku maxkalenxa se.

Xi a pya kwatu se di folo ku ka-venta, ku ka-gaxta yo djelu ku pokaria se, ka-sa ka-bila ve sedu y pobli, maji nen kolonba ku te ke ku ka-fe sigaru (y mo a sebe nge ku te nogoxo se na ka-venta yo fa, sa mo nen nge ku ka-vende "lianba") ka-sa ka-bila dinen liku kada dja. A ka-be nen kolonba ka-pe kwa ni vende ku yo meka ku kolo pa tudu goxto y a ka-bele ni tudu kamya. Kolonba ten sa ne ka-venta y ka-mole ku dwentxi ku venta ka-da. Djelu ku a ka-nganya ku sigaru ni mundu ka-da sun leva. Kwa sa djelu muntu... Ku nogoxo se, e bila te otlo ku sen nay ku non na ska-fla ne nayen fa.

Folo na sa povo ku ka-venta ne bebe pasa fa, maji ka-dja nga be nen mina ku nen mosu ka-mese fe mo kolonba. Zo nmese puntinen: ke doxi ku venta se te? Ke kwa ku a ka-nganya ku venta se? Kenge ku a ska-pe dwentxi ni ke ku nanse - punda na sa nge ku ka-venta tan soku ka-dwentxi fa!?

Ni tela non - SanTome ku Ie -, non na toka te kwa se ni vende fa! Ke likeza ku kwa se te da non, povo se pobli, ku na te kwa kume fa?! Non sebe kuma e te yo vin ten ku a ka-sa ka-kopla ka-bi bende da non. Pla ami, nen pokaria se ka-sa vende ka-poto! Kolonba ku ka-bende nen kwa da non, nen mese bila liku tan. A mese pa a koplinen vin, tabaku, pingada, livlu ku uku ku a xkleve ne, ku otlo-otlo kwa ku maxi montxi ve na ka-xtlivi dinen nala tela dinen maxi fa.

A be kuma mo nge ku te nen ke se ku ka-nganya djelu ku tabaku sa kolonba, nen ke sen ante oze y a na ka-manda da fogo ne fisa fa. Nge ku na te sotxi fa o ixi ku te ubwe ku na ngwenta basa di sigaru fa soku ku ka-padise de so. Xi nga te unwa nen ke se ku ka-fe kwa di nganya djelu y xi kwa se ka-sa ka-mata nge, a na ka-tada yo di anu (49) ni xkola ka-golo di sebe xi e ka-fe mali di vede, zo pa a pe letla ni masu di sigaru pa a po pya kuma kwa ka-fe nge mali. Axen me a sa ni tabaku ka-bende yo antawo y anzu ten sa ne ka-kopla. Kenge ku mese sebe? Nen ngandu se ku sa we kwa tela non? Sun bebeda o!!...

Nayen, a ka-be kwa ku Nigeria fe plovya di nen ke se ku bende sigaru y fe pa yo maxibin komesa ka-venta sedu ni tela dinen, pa a po nganya maxi djelu:

http://brasilcontraapedofilia.wordpress.com/2007/11/07/nigeria-quer-indenizacao-de-us-42-bi-de-empresas-de-cigarro/.

Mo a sebe, ni mundu, nge ku sen maxi montxi ni unwa tela sa maxibin, elemanda ku nen kliminozu se ka-lentla nge tela pa a ngunda nen mosu ku nen mina pa a po kopla nen pokaria se. Zo ola a ka-sa flimadu ku mina soku maxkalenxa ka-sa ka-xe ba lwa. Sa kolonba bila de liku za y e na ka-mese bila sebe di molexta di pletu fa!

Kwa ku nmese tan sa pa a na bila kopla kwa ku non sebe kuma e ka-fe nge mali fa. Ise ku non na sebe antawo fa, sela non lanta mon ba liba sama Desu. Punda tabaku ku vin (e te folo ku konse nomi di tudu dinen ku a bende ni SanTome ku Ie) na te lazon di sa ni vende fa. Punda ke kwa?

Pa non te tela xa di vajin ka-nda ni xtlada ka-tloka ope, ka-ta ke tasondu ka-sende mon ola a ka-xintxi fomi ni bega?
Pa a te nge ka-futa povo nganya ni kapwela?
A ka-ba golo loso, sukli, npon, fanya, fezon, a na ka-be fa! Xa ke kwa?

Zo nen kolonba ku gabon ku ka-lentla tela ku mese nen kwa se, sela non fadinen kuma tela non na te nen pokaria se fa. Punda nge ku ka-venta ku ka-bebe sa nge ku te nogoxo ku djabu. Y non sebe kuma e sa vede, punda nen na ka-bwa ni kabesa, ka-fla vonvon so! Ka-ko nen ngandu se ku non te ni "parlamentu". Elemanda ku a ka-sa ni pokaria di vungu, ku nen kwa se ku a ka-kopla ni mon di kolonba pa a pe ni televizon pa povo po pya. A ka-sa ka-bende tela ku toka povo da kolonba y zuga povo pe ni lwa!

Djabu ka-levinen damu!

TLEBESUBE

TLEBESUBE

A fla kuma sun ka-nda sun ka-be kwa. Nna ta ka-kele ni kwa se fa punda sun ka-po sa mundjadu ten ni we di poto ka-kume kola y sun ka-po be kwa ten. Maji kwa ku ntende sa axi: xi sun lanta kadela ba golo kwa pa sun pe ni kabesa sun ka-po defende vida ni mundu se. Punda kliminozu ku te sebe na ka-ba kadja fa y ixi ku sa blutu soku ka-poto de nala.

Zo e te pobli ten ku ka-po na te modu di xe ni kadja ten fa, punda e na te djelu di monya nge mon fa! Maji unwa kwa sa setu: nge ku sa blabu na ka-mole pobli fa y a na ka-ngane fa, mo a ka-fe ku yo dinen pletu se ku sa ni mundu. A ka-be pletu ka-fe papelu di nge ku mese musa kuma e sa blabu, maji ola e ka-plase ni we nge pa e fe kwa a ka-li e, fe poko de y tudu pletu (ku na te nadaxi ni kabesa fa) ka-kuji koloba ten fla kuma e fika gletu. Nkonveta nen zentxi se!

Nayen nga ba pe dosu o tlexi kwa ku ka-musa modu ku pletu ka-fe kwa pa kolonba li peta zo sama non tudaxi blutu.

Xi a mese sebe punda kwamanda ku nen Ngandu ku ska-manda ni non folo ka-ko bobo dansu, a ka-pya kwa se ku npe nay ku ska-musa modu ku nen kolonba ka-fe kwa se lepalu ku nen Ngandu ten ka-kole ba fe. Tlebesube soku ka-fe inen folo se ku nen kolonba, ku mese musa mundu kuma a sebe kwa muntu y a sa blabu. Maji nge ku ka-fika mali ni letlatu maxi sa pletu, punda povo de sa pobli y a ka-kole ba piji inen favolo axen me. Pla inen folo se, vlegonya na sen fa! Yo dinen na sebe nadaxi me fa y a ka-sa ka-fe kwa malaboya so. E te jidinen ku sa mo di ise ku sa pode en... ku otlo-otlo Ngandu, ku na te xkola fa. A ka-fla kuma a fe kwa di dotolo a fe kwa di tlaba di zuda povo, di fe nogoxo, maji a ka-pya bega nen so.

E te nge ku ka-tende mu ka-fla nen kwa sa ka-blose, ka-volo mu. E te "folo" (ku sa maxi kolonba doke pletu) ku nen kwa se ku nte ni kabesa, ku nka-sa ne ka-xkleve, ku jina e nanse e naxi tende kolonba ka-fla fa, e ka-sama "jykiti-wakongijmu". Ngogo ku kwa se ku "gabon meda" se fla luma. E na ka-po same otlo kwa ten fa.

Nen kwa se ku ka-fe pletu ka-tende kolonba dodo sa punda a na te xintxidu di kwa mundu me fa. Tudu ola a ka-sa ni "akesimentu global" ka-fla ka-subli ka-dese y a ka-be kaso pletu, Ngandu tlebesube, ka-kujinen... "YO! Kalolo muntu ku kwa ska-fe o... kolonba te lazon de fan... AWO!". Nen kolonba se soku ka-nganya yo djelu non y inen soku ka-xina nen mina non kwa ni xkola pa a bila dotolo. A be blabu ku nen nge ku sa pode ni tela kolonba sa?! Zo non ka-be nen nosentxi se ku sa we kwa ka-manda ka-da ben dinen so... A be? Ke kwa ku a mese pa nen maxibin fe ni San Tome ku Ie xi a mese fe kwaxi ku a ka-be nen blutu se ka-fe?!




E komu kwa ten ku ska-kunda kuma nsa ku we xa dinen ku ka-ta ni tela di kolonba ka-nganya bon djelu, ka-legela ku djelu ku a futa non folo se pobli ni San Tome ku Ie, ka-kobo nen kolonba kadela, ka-fe nen anzu non mali ola a ka-bluguna ba tela non ba paxa.

Maji kwa ku nen na sebe fa sa kuma, xi desu ka-sa pletu y folo, nen ka-sa ni Obo ka-subli pema ka-txila vin; ka-poda kakai ku kafe ni matu; ka-tlaba aliba ku mantxin ni mon pa a ximya kitxiba ku min; ka-txila fluta ku safu ku jaka; ka-ba omali ba golo pixi pa palaye po bende ni fela; ka-ba matu bunzu, xtloko ku pape; ka-klaga zekentxi ni kwali ni liba kabesa plaman sedu; ka-klaga andji ni ngama ba mwala ba fe zete. Nen kwa se soku nen toka sebe ku toka sa dixtinu nen xi desu ka-sen ni mundu se non.

Xi desu se sen me di vede y xi e na sa zuxi ku ka-kuji ladlon, pligisozu ku kolonba fa, unwa dja me ke dinen ka-pega fogo ku nen ni ngletu de ku tudu kwa ku a tason kopla ku djelu povo.

VIDA KOLONBA

VIDA KOLONBA

Kuma ku mundu se non ka-po sa bwadu da pletu?

Non ska-sufli ka-tlaba ka-fe nogoxo ku kolonba, ka-dinen djelu ku olo ku petloli, maji axen me tela non sa de pobli, nga be nge ku kala fisadu so, se kwa di kume, yo nge pobli-pobli so, ku anzu ka-padise de, ku maxibin ka-fla vonvon...

Nge ku sa liba ka-manda ni povo na mese sebe di povo fa. A ka-be nen ka-subli avyon ka-ba tela ka-fada povo kuma a ska-ba golo djelu ku kume pa a po manda ni vapo da povo. Maji ola a ka-fo nen xitu se ku djelu ku a plesa ni jibela, a ka-pe ni otlo tela di kolonba pa a po kopla kwa ku nen mese pa a fe luxu ku e. Povo ka-sa ka-be nen nge "godo" - ngandu, ladlon ku a toka fisa ni kadja zuga sabi buta - ka-fla «awo!... nen nge se soku te sotxi!... nen nge se soku Desu koye pa te kwa, vive dinen bon vida nen...».

Non sebe kuma yo kolonba ka-te djelu pa e kume bila de godo, te bega nglandji - a ka-ba ple sende toia bila bega se balili-, y xi kume ku a te sa montxi a ka-zuga kume se buta o a ka-da kume fogo xi e soveza na bende fa. Nen ka-te djelu maxi doke pletu punda mofala xi a ba tela pletu a ka-kopla olo ni mon non xintoson, maji ola a ka-bluguna ba tela dinen olo se ka-vale yo djelu - ku ka-da pa nge na bila tlaba ni vida de maxi fa, ku ka-da pa e kopla avyon, vapo, fe menmen ke, paxa loja mundu ntelu. Pletu ku ka-tufu tloku (minda di kwa ku e ka-futa ku toka yo nge) pe jibela, e ka-kole tom avyon ba ligi unwa kwa ku ka-kuxta yo djelu bi ku e y ixi ku e sebe kuma a ka-ba pya ola e ka-xiga tela non - kwa pa e fe poji musa kuma e sa nge maxi doke otlo.

Yo dinen na ka-mundja ni tela non me fa, sela ola a ka-mese tom pode pa a tason bila fe nogoxo di dana tela non buta. Maji sela povo sebe kuma ola a ka-sa ka-nda ni nglentu nen karu se, o a ka-fe menmen ke pa a ta ne xa di kwa, sa djelu di yo nge ku na te kwa pa e kume fa soku kopla. Sela povo sebe kuma tudu kwa ku nen te ku djelu ku a ka-sa ka-fe poji ku e, ka-ngana nen mina nova ka-va kadela sa djelu ku toka nge ku ska-pasa mixidaji ni San Tome ku Ie.

Tudu non sebe kuma yo dinen nge se na nanse ku nen kwa se fa y a na tlaba pa a nganya djelu di kopla tudu nen kwa se pa plesu ku nen kwa se ka-vale fa. Sososo sa nen nge se ku ta ni we kwa povo ku xe, ku otlo-otlo ku sa ni tela non ka-manda ku te ma fe, ku ka-manda boka da mali povo pobli, ku ka-da mali di tela non ola a ka-sa we di kolonba, a toka dinen ku budu ola a ka-sa ka-vala ni karu. Nen nge pobli ku a ka-fe poko de toka te inen mala pe ome di xtlada zo zuga budu ante ola ku a ka-be kuma kabesa na bila sa bwa di fe nge mali fa...

Punda pa nen kolonba te djelu di vive bon vida nen bila liku, sela non pletu bila pobli pasa mixidaji, fika se djelu di kopla mindjan ku kwa kume. Y pa tela kolonba te bon ke, bon karu, pe nen mina nen ni xkola ka-xtuda ku livlu, lete ku npon, bon lopa, tudu dja, sela pletu dinen olo ku petloli. Punda mo nfla, pletu (ngandu) ka-fika ku "1000" pa kolonba po fika ku "1000000", sososo e na ka-po te modu di povo txoko po vive ni mundu se fa!

Tudu kwa ku ska-pasa ku pletu en... sa punda nge ku sa we di kwa non te ma fe pasa! Kolonba ten ku te ma kloson ku na ka-pota ku nadaxi xi e na sa djelu di bila bega nen godo fa, ku djelu pa a po tason konta ante ola a ka-mole, nen na mese sebe fa. Zo ola nen ngadu se ka-ba paxa ku kala nen ka-ko demono, nen kolonba ka-bili poto saminen pa a po tason tom unwa kopu vin da kebla...

Povo pletu ka-sa ka-mole de ni xipitali, anzu ka-fika ni ke o ba xkola ku fomi ni bega, maxibin na te xtluvisu fa. Ngandu ka-golo tudu modu (e po mata manu de pletu, mo yo dinen ka-fe ola a ka-futa djelu ba pe ni tela kolonba) pa a te vida di kolonba, elemanda ku tela non na ka-ba we fa.

Kolonba ten, ola e na ka-be modu di bila liku ni tela de fa, ka-bluguna ku unwa mon ni we y otlo ni tlaxi ba tela pletu ba "tlaba" djelu (klaga olo pe avyon o vapo, ola pletu ka-sa ka-dumini - punda ne kamya ku olo sa ne gwadadu pletu na ka-sebe fa...) ku pletu ka-tlaba dinen mo kaso-xinja. Zo ola a ka-ba tela dinen ku yo djelu ni jibela, ku bega maxi godo antawo, ku a ka-xiga ala, a ka-volo tudu non sama nomi...

Kwa mundu na ka-po be so fa!
Iyemanja ka-zuda non!
Ante dja se!